30 janar 2011

Anjeli: "Nuk kemi kërkuar as Lipin dhe as Spaletin, janë gënjeshtra"

Torino - "Lexoj nëpër gazeta që do të mbërrijë Lipi dhe Spaleti, është një gënjeshtër. Kemi besim maksimal tek Luixhi Del Neri dhe në stafin teknik që kemi krijuar. Në një konferencë për shtyp dyshe sëbashku me drejtorin e përgjithshëm Bepe Marrota, presidenti i Juventusit, Andrea Anjeli, nuk ka përdorur terma të ndërmjetëm për të mohuar zërat mbi një ndryshim të menjëhershëm në bankinën bardhezi. "Kemi besim maksimal në projektin që kemi ndërmarrë dhe nuk do të ketë shtesë të kapitalit". Marrota kthehet të flasë për merkaton e janarit: "Një goditje e rëndësishme nga ky moment e deri në mbyllje të merkatos mendoj se duhet të përjashtohet". "Problemet që jemi duke menaxhuar këtë vit ishin të parashikuara dhe nuk modifikojnë aspak objektivat që kemi vendosur, ka vazhduar më tej Anjeli. Motivi për të cilin kam mbërritur, dhe flas shpesh me kushërinjtë e mi dhe me familjen time, është sepse besojmë tek Juventusi. Deri tre javë më parë, komentatorët dhe opinionistët flisnin për një Juventus që ishte në gjendje të luftonte për titullin kampion. Ne ndërkohë nuk jemi ekzaltuar më parë dhe nuk do të demoralizohemi as në këtë moment. Janë dy elementët që kanë dalë në pah në këtë situatë të krijuar: besimi tek puna e njerëzve që kanë mbërritur tek Juventusi dhe elementi i programimit në një periudhë afat gjatë".

Jashtë nga Europa Ligë dhe nga Kupa e Italisë, Juventusit tashmë i ka mbetur në objektiva vetëm kampionati. "Kur largohesh nga dy kompeticione nuk ka sesi të jesh i kënaqur. Juventusi duhet të mbërrijë në pranverë shumë kompetitiv. Sigurisht që, nëse vitin e ardhshëm do të jemi në të njëjtën situatë atëherë sigurisht që do të ishte një problem". "Niveli dhe buxheti jonë i pagesave është i gjashtë në nivel europian, është shprehur përsëri numri një i Juventusit. Kemi në dispozicion një makinë të rëndësishme, një makinë të nivelit të lartë që duhet të drejtohet mirë. Ne, këtë vit, e mbyllim vitin me një humbje sinjifikative. Kjo nuk ndryshon aspak programet tona dhe ambiciet që kemi për të ardhmen, përballë një tradite fituese që ka kjo skuadër. Nuk do të ketë sigurisht shtim të mëtejshëm të kapitalit. Në 170 milionë eurot ndërmjet pagesave dhe detyrimeve ekziston hapësira për të lëvizur mirë dhe jo detyrimisht nëpërmjet shitjes së lojtarëve". Pas komentit të presidentit bardhezi, menjëherë më pas ka marrë fjalën drejtori përgjithshëm Bepe Marrota, që ka folur për merkaton dhe të ardhmen e skuadrës: "Ne kemi një grup me një drejtues si Del Neri, që meriton një besim total. Një grup që bën pjesë në një proces rinovimi. Dikush ka thënë që duheshin më pak lojtarë dhe më shumë cilësi në blerje, por dëmtimet na kanë mësuar që një grup prej 22 lojtarësh nuk është i mjaftueshëm.