Ishim të qartë në komunikatën e javës që shkoi, tani po vëzhgojmë. Rëndësi ka që të ruajmë tonet e duhura. Do të ketë kohë për të marrë vendime dhe në këtë rast duhet të flasë vetëm drejtësia”. Janë fjalë të Zhan Klod Blankut, presidentit të Juventusit që flet mbi “Calciopolin” dhe minimizon protestën e tifozëve bardhezinj: “Tifozët e Juventusit janë 14 milionë dhe jo tre persona që vendosin një parrullë as 50-të që kundërshtuan si dy ditë më parë”.Blanku nuk kërkon të hyjë në detaje ndaj kërcënimit të mundshëm që i bëri lojtarëve për të mos i paguar nëse s’luajnë mirë: “Ajo që thuhet brenda, mbetet mes nesh, - nënvizoi numri një bardhezi. - Prandaj nuk bëj komente, besoj te ky grup dhe në aftësinë e këtij stafi për të dhënë maksimumin në ndeshjet e fundit. Protestat e tifozëve ndaj nesh? Tifozët nuk përfaqësohen vetëm nga tre njerëz që vendosin një parrullë. E dimë që ka zhgënjim mes tyre, - vazhdon Blank, - por çdo gjë duhet bërë në mënyrë civile. Është një gjë që sistemi i futbollit duhet të reflektojë: nëse duam të hapim stadiumet për familjet, është e rëndësishme që njerëzit të vijnë në stadium dhe të bëjnë veprime civile edhe kur rezultatet nuk vijnë”.