Te Juventusi që mundi Barin të dielën, spikati sigurisht buzëqeshja e Vinçenco Iakuintës, i kthyer te goli pas pesë muajsh mungesë për shkak të dëmtimit në meniks në fillim dhe pastaj në gju, i zbuluar gjatë operacionit. Lojtari pranon të gjithë kënaqësinë e tij që e ka kaluar këtë moment të vështirë dhe pohon hapur se shpreson edhe te grumbullimi me Italinë në prag të Botërorit pas më pak se dy muaj.Dëmtimi në gju më bëri të mendoj se mund të humbisja Botërorin dhe sezonin, - shpjegon sulmuesi bardhezi. - Qëndrova jashtë pesë muaj, nuk ishte një gjë e lehtë. Është e qartë që dy golat që shënova kundër Barit, përfaqësojnë para së gjithash një sinjal për Marçelo Lipin.
Është e kotë pastaj të nënvizoj që nga ana tjetër jam i kënaqur që e ndihmova skuadrën të fitojë pas një periudhe jo të lehtë. Megjithatë jam shumë i lumtur nga fakti që trajneri Lipi më ka telefonuar disa kohë më parë për të mësuar sesi isha dhe për të më konfirmuar stimulin e tij ndaj meje”. Prania në fushë e Iakuintës, ka ndihmuar edhe Diegon të shpërthejë, autor i një paraqitjeje të mirë: “Kur luaj, sigurisht që përpiqem gjithnjë t’i jap thellësi skuadrës në fushë dhe të krijoj hapësira për mesfushorët, - vazhdon Iakuinta. - Diego luajti shumë mirë dhe më dha një pasim të bukur për gol. Sidoqoftë, arsyeja kryesore e sezonit tonë negativ, janë dëmtimet e shumta”.