Dominik Adiah është lojtari që ka fituar “Topin e Artë” në botërorin e fundit Under 20, ku është shpallur kampion me Ganën e tij, duke u shpallur edhe golashënuesi më i mirë i këtij kompeticioni me 8 gola. Sulmuesi ka lindur në Akra më 10 korrik të 20 viteve më parë. I rritur në “Akademinë e Fejenordit’, ka debutuar në kampionatin ganez me ekipin e Hart of Lions.Më pas në gusht të 2008-ës ka ardhur transferimi në Norvegji tek Fredrikstadi. Dhe pikërisht nga Oslo kanë ardhur lajme për një interesim të Milanit për sulmuesin e shpejtë që në botërorin e sapofituar në Egjipt i ka bindur të gjithë për aftësinë e tij të shkëlqyer për të gjetur rrugën e golit. Jo rastësisht në 16 ndeshjet e zhvilluara me kombëtaren Under 20 të Ganës ka shënuar 17 gola. Sipas zërave që vijnë nga Norvegjia duket se për lojtarin ka ardhur një ofertë prej një milion e gjysëm euro nga një klub i madh europian. Milani nuk ka konfirmuar asgjë, por as nuk ka përgënjeshtruar.