11 maj 2010

Shifrat: Zakeroni, më keq se Ferrara

Me humbjen e marrë kundër Parmës në “Olimpiko” të Torinos, Juventusi i ka thënë përfundimisht lamtumirë vendit të gjashtë në kampionat dhe do të duhet të marrë pjesë në fazën paraeliminatore të Ligës së Europës, për më shumë edhe falë Interit dhe Romës që kanë “anulluar” vendin që i takonte fitueses së Kupës së Italisë. Një verdikt i rëndë për skuadrën bardhezi, por edhe për trajnerin e saj të përkohshëm Alberto Zakeronin që ka arritur të bëjë më keq se paraardhësi i tij Ferrara, siç tregon mesatarja e pikëve: 1,353 ajo e teknikut aktual, kundër 1,571 të Çiros.

Dhe nëse Juventusi do të humbiste të dielën e ardhshme kundër Milanit do të barazonte rekordin negativ të 15 humbjeve në kampionat të arritur në kampionatin e largët ‘61-’62. Megjithatë Zak nuk dorëzohet: “Tekniku më i përshtatshëm për Juven e ardhshme? Unë do të merrja gjithmonë Zakeronin, duke iu referuar shembullit të Mourinjos që me të drejtë thotë se nëse një trajner mendon se është inferior ndaj një kolegu e ka shumë të vështirë t’i transmetojë siguri skuadrës. Eshtë hera e parë që më ndodh të mos përmirësoj pozicionin në renditje të një skuadre, drejtimin e së cilës e kam marrë pas fillimit të kampionatit. E ardhmja? Shpresoj që vitin e ardhshëm të drejtoj një skuadër nga fillimi”, ka thënë Zakeroni.