Bardhezinjtë kanë pësuar tri humbje radhazi dhe nuk shënojnë në kampionat prej një muaji
Një humbje me Milanin mund të jetë e pranueshme. Por të mos shënosh prej një muaji është më pak e pranueshme. Mbi të gjitha nëse quhesh Juventus. Skuadra e Del Nerit, nuk e çon topin në rrjetë që nga 13 shkurti, pra 330 minuta, kur në “Olimpiko” ndëshkoi rivalët e urryer të Interit me një gol të Matrit.
Nga ai moment bardhezinjtë kanë ecur në një errësisë dëshpëruese: tri ndeshje (Leçe, Bolonja dhe Milan), zero pikë, zero gola. Pak gjuajtje në portë dhe faktori fushë që nuk i ndihmon aspak. Një ecuri më shumë se shqetësuese, që duket se nuk ka zgjuar akoma dëshirën për t’u ringritur të skuadrës dhe nuk largon frikën e madhe që po shqetëson tifozët bardhezinj.
Një gjë është e sigurt: me 5 humbjet e marra në 9 ndeshjet e fazës së dytë, ecuria e Juventusit është më shumë se zhgënjyese. E dëshpëruar, e papranueshme, ose thjesht skuadra më e keqe e kampionatit. Dhjetë pikë në total: fryt i vetëm dy fitoreve bindëse të marra në harkun e pak ditëve, në Kaljari dhe kundër Leonardos, i një suksesi jo shumë bindës (në Torino kundër Barit) dhe i një barazimi me Sampdorian.
Ajo e Juventusit është një krizë e vërtetë. Të marrim sulmin. Në janar, për shkak të një force madhore, u blenë Toni dhe Matri, deri tani 4 gola të dy. Por, bardhezinjtë në tri ndeshjet e fundit nuk kanë shënuar. Ndonjëherë, si me Milanin, kjo ide as që i ka shkuar në mendje.
As zotëria 12 milionë euro, që mban emrin Horge Martinez, nuk ka dhënë një kontribut të vlefshëm. As rikthimi i Iakuintës pas shumë dëmtimesh apo dëshira e Del Pieros. Zero. Juventusi nuk shënon dhe nuk krijon raste. Vetëm ndonjë zgjidhje nga goditjet standarde.
Mungesa e golit, që zgjat prej 330 minutash, ka ndodhur vetëm një herë më parë në sezonin ‘97-’98, kur Lipi ishte i detyruar të japë dorëheqjen (i zëvendësuar nga Ançeloti) pas 5 ndeshjesh pa gola.
Kapitulli “Mbrojtje”. Ndërsa Del Neri po sforcohet për t’i gjetur pozicionin e duhur Kielinit dhe Barzaljit, duke aktivizuar në krahë lojtarë që nuk janë plotësisht të përshtatshëm për Juven, mbrojtja bardhezi është më e mposhtura e Italisë në ndeshjet e luajtura në shtëpi (22 gola të pësuar, Palermo është e parafundit me 21).
Në fazën e dytë faktori fushë është neutralizuar në ndeshjet kundër Udinezes (1-2), Bolonjës (0-2) dhe Milanit (0-1). Pesë humbje në shtëpi të këtyre përmasave janë me të vërtet shumë për një skuadër që synon të sigurojë një vend në Champions.
Juventusi ka grumbulluar 41 pikë, 4 më pak në krahasim me javën e 28-të të kampionatit të kaluar, kur në stol ishte Alberto Zakeroni. Drejtuesit bardhezinj vazhdojnë të thonë se nuk ka ngjashmëri me vitin e kaluar (një zhgënjim total) dhe se gjërat ecin më mirë. Siç duket, te Juventusi, të paktën duke iu referuar shifrave, kanë probleme edhe në bërjen e llogarive. /JUVENEWS.TK/