Edvin Van der Sar ka konfirmuar që në fund të qershorit do të varë dorezat në gozhdë dhe Aleks Ferguson, trajneri i Mançester Junajtid, “vë nën presion” Xhianluixhi Bufonin, i cili shihet si pasardhësi numër një i portierit holandez, që ndër të tjera ka pasur edhe një përvojë (të shkurtër) me Juventusin. Nëse numri një bardhezi është objektivi kryesor i “timonierit” skocez, së bashku me drejtuesit e “djajve të kuq”, Fergusoni po e studion që tani planin “B” nëse nuk do të arrijë të finalizojë blerjen e Xhixhit.Shtypi anglez ka shkruar se qenka bërë edhe një sondazh me Lionin për Hugo Loris, portierin 24-vjeçar që është në xhiron e kombëtares franceze dhe është i lidhur me klubin e tij me një kontratë që i skadon në qershor 2013-të. Zhan Mishel Ola, presidenti i klubit transalpin, zakonisht thotë “jo” apriori kur përpiqen t’i marrin një lojtar me peshë, por këtë herë ka fiksuar çmimin e kartonit: 23 milionë euro. Dhe Fergusoni, që nuk ka aspak dëshirë të jetojë me “tërhiq e mos e këput” me Bufonin, ka marrë qëndrim me kënaqësi. Nëse nuk vjen Bufoni, ka gati Lorisin pra.