Heshtja dhe mungesat e tij kanë bërë zhurmë, por Xhixhi Bufon po ndjek progreset e Juventusit “të tij”. “Është një skuadër shumë solide, shumë e re, sa i takon së ardhmes mendoj se është punuar mirë, - thotë portieri i Juventusit. - Largësia në renditje me skuadrat milaneze duhet reduktuar me fakte, pra do të shihet në fund të kampionatit. Nëse do të jemi 18 pikë larg Milanit, sigurisht jo, nëse do të jemi 3-4 pikë mund të them po”. Pastaj, Bufon shuan qetësisht zërat që qarkullojnë mbi të ardhmen e tij larg Torinos: “Në dhjetor do të jem në Vinovo, në janar në fushë. Do të rifilloj më në fund të stërvitem me grupin në dhjetor, për t’u kthyer më pas në fushë në janar. Nga 9 gushti po stërvitem dy herë në ditë, një farë përgatitjeje që po më ndihnmon shumë. Doni të dini ku do të më rishikoni në janar? Te Juvja”. Misteri Bufon shuhet? Akoma jo. Retrospektivë. Mosmarrëveshja e parë mes Xhixhit dhe “Zonjës” lind në mes të qershorit. Pas dy sezonesh mes fushës e infermierisë, për problemet e ditura në shpinë, portieri njofton operacionin në hernien diskale. Më pas Juvja blen Storarin. Një numër 1, jo një 12-të, zëvendësi mbetet sërish Maninger). Pavarësisht nga mosha 33-vjeçare e ish-milanistit, një kandidat serioz për të trashëguar fronin e Bufonit, ky i fundit ka epërsinë që qëndroi te Juvja edhe kur zbriti në Serinë B në 2006-ën.Ajo që i vështirëson edhe më shumë raportet me drejtuesit e rinj bardhezinj, Anjeli-Marota, është edhe kontrata e “Super-Xhixhit”, i cili fiton thuajse 6 milionë euro në sezon. Një shifër që në klubin bardhezi duan ta reduktojnë për të kursyer. Storari pastaj ishte menjëherë vendimtar, i besueshëm për Juven. Paraqitjet e tij largojnë nga axhenda juventine emrin e Bufonit, që për momentin po merret me çështje sociale, por pa harruar të theksojë për “t’u kthyer më i fortë se më parë”. Në katër muaj asnjë vizitë në Vinovo, asnjë kontakt me grupin e Del Nerit. Vetëm katër dalje: në “Marasi” të Xhenoas për të takuar shokët e kombëtares, në “Casino” të Sanremos për një ngjarje, në stadiumin e Karrarezes së tij dhe në Davos për të tërhequr një çmim. Përkushtim ky i fundit që e detyroi Juven ta zëvendësojë foton e tij në atë të skuadrës me një kundërfigurë. E njëja gjë u përdor edhe për Amaurin, Martinezin e De Çeljen. Por mungesa e numrit një është më e dukshme. Zërat për një të ardhme të tij në Mançester (Junajtid ose Siti), nuk ndalojnë as pas 7 nëntorit, kur portieri i përgjigjet ftesës së Juventusit për një “sfilatë” në “Olimpiko” së bashku me yjet e tjerë juventinë. Xhixhi sfilon mes ish-kampionëve të vjetër, por nuk shkon ta takojë skuadrën në dhomat e zhveshjes. Një tjetër e dhënë, e dyta, e një divorci të menjëhershëm? Po, jo, ndoshta. E sigurt është vetëm që deklaratat e mësipërme, nuk mjaftojnë për të arkivuar një çështje, që në janar është sigurisht e destinuar të rihapet.