26 nëntor 2010

Juventusi për rekord, emergjenca mbaroi!

Dje në Vinovo Del Neri kishte 17 lojtarë të gatshëm, si asnjëherë tjetër në këtë sezon. Dëmtimet reduktohen

Bardhezinj, jini të bashkuar! Klub, skuadër dhe tifozë bashkohen në prag të sfidës së nesërme kundër Fiorentinës. Rast për të mos u humbur për t’i dhënë vazhdimësi fitores së bukur ndaj Xhenoas, për të arritur në “katet” më të larta të renditjes. Duke përfituar edhe nga dita e bukur me diell në Vinovo, presidenti Andrea Anjeli, i shoqëruar nga miku-këshilltar Pavel Nedved, ka ndjekur stërvitjen nga afër.

Numri një i Juves bisedoi gjatë me Del Nerin për të njohur edhe më mirë gjendjen e bardhezinjve para sfidës me “armiqtë” vjollcë. Një orë bisedë për të thënë diçka mbi të tashmen dhe për të caktuar objektivat e së ardhmes. Presidenti dhe trajneri ama ishin në shoqëri të mirë: 17 futbollistë të gatshëm për Del Nerin, një rekord dhe 300 tifozë të entuziazmuar në tribunat e vogla. Këtë vit në Vinovo nuk ishin parë kaq shumë njerëz.

Del Neri më në fund mund të eksperimentojë sesa i bukur është sikleti i zgjedhjeve. Pas dy muajsh emergjencë totale, me djemtë e skuadrës së të rinjve në shërbim të skuadrës së parë, infermieria po boshatiset. Kanë zbritur në shtatë lojtarët jo të gatshëm për “Zonjën”: Bufon, Rinaudo, De Çelje, Legrotalje, Martinez, Amauri e Grigera, me këtë të fundit që pritet t’i bashkohet shpejt grupit. Lajme të shkëlqyera edhe nga Akuilani, i cili e kaloi problemi në kofshën e djathtë dhe do të jetë gati kundër Fiorentinës.

“Far” i lojës dhe fatsjellës: që kur ish-romanisti luan titullar (Juve-Kaljari 4-2, 26 shtator), Juvja nuk ka humbur asnjëherë. Akuilani punoi me grupin, por pa zhvilluar ndeshjen stërvitore. I njëjti program edhe për Motën. Nesër do të jetë edhe Del Piero, ndonëse kapiteni qëndroi në palestër, pasi ishte me grip. Ky bollëk i pabesueshëm lojtarësh, do ta lejojë Del Nerin të bëjë ndonjë rotacion në prag të ndeshjes në Ligës së Europës, të enjten më 1 dhjetor në Poloni kundër Leh Poznanit, kur Sisoko e Del Piero do të thirren të zëvendësojnë Akuilanin e Kualjarelën, që janë jashtë listës së UEFA-s.