29 gusht 2010

Juventus do të dorëzojnë te FIGC 18 mijë telefonatat e përgjuara, të anashkaluara në hetime

Presidenti i Juventusit, Andrea Agnelli, ka konfirmuar se klubi nuk do të heqë dorë nga përpjekjet për të rimarrë dy titujt e Serisë A, që i janë hequr pas skandalit “Calciopoli”. “Tuttosport” pretendon se Federata Italiane e Futbollit nuk po arrin të sigurojë telefonatat e përgjuara nga Gjykata e Napolit dhe se bardhezinjtë janë gati t’i vijnë në ndihmë Stefano Palacit, të ngarkuarit të FIGC me këtë detyrë, duke i dorëzuar një përmbledhje me përgjimet e zbardhura dhe që janë gati për t’u përdorur. “Materiali që kemi prezantuar është mjaft i detajuar dhe me baza”, tha Anjeli. “Është një provë materiale për revokimin e një titulli. Nga ky këndvështrim nuk presim përgjigje të shpejtë, por besojmë se kauza jonë do të përfundojë në mënyrë pozitive. Po flasim për një situatë komplekse, në të cilën duhen pasur parasysh shumë pengesa ligjore, por do të tregojmë korrektesën tonë për çështje që janë ende të hapura. Natyrisht që do të vlerësojmë edhe veprime për ricaktimin e titujve për Juventusin”.

Në dokumentacion përfshihen një seri përgjimesh, shumë prej të cilave janë bërë publike nga mediat, duke nisur prej muajit prill të këtij viti dhe që janë pjesë e 171 mijë telefonatave të mbledhura gjatë hetimeve të periudhës 2004/05, por që asnjëherë nuk janë marrë në konsideratë nga drejtësia sportive dhe ajo penale. Telefonatat e “zbuluara” nga avokatët e Luciano Moggi-t kanë hapur skenarë të rinj rreth skandalit “Calciopoli”, pasi aty tregohej se nuk ishin vetëm drejtuesit e Juventusit ata që kishin kontakte me disenjatorët e gjyqtarëve apo edhe me vetë arbitrit. Vonesa nga gjykata ka bërë që hetimi të mos nisë ende. Kjo ka bërë që drejtuesit e Juventusit të mendojnë të depozitojnë në selinë e FIGC një dokument me tekstet e përgjimeve më domethënëse. Një lëvizje që vjen pas kërkesës së muajit maj për të rimarrë titullin e vitit 2006, të cilin Interi e fitoi në tavolinë. Pretendimet bazohen në telefonata si ajo e 10 shkurtit 2005, që është bërë publike vetëm së fundmi: aty Giacinto Facchetti telefonon Tulio Lanezen, presidentin e arbitrave dhe i rekomandon një mik (Ambroxho Sfondrinin) për “një post të rëndësishëm” tek AIA.