Kavani do të qëndrojë te Palermo. Nëse Morati e do të ma kërkojë, por ta dijë që unë nuk e shes”. Fjalë dhe “muzikë” të Mauricio Zamparinit. “Ky lajm ka dalë nga menaxheri i tij, që po lëviz në mënyrë jo korrekte, - vazhdon Zamparini. - I dërgova një telegram për ta parandaluar. Është gjithçka një sajesë, edhe Federatën Italiane të Futbollit e paralajmërova. Djaloshi është shqetësuar nga këto zëra, por është një profesionist serioz. E këshilloj të shkojë tek Interi kur t’i premtojnë që të jetë titullar.I bën mirë të qëndrojë te Palermoja për t’u pjekur akoma si futbollist”. Pastaj Zamparini pranon që ka marrë një telefonatë nga presidenti i Lacios, Klaudio Lotito për Kavanin (”i thashë që nuk lëviz”). Pastaj një mendim për Delio Rosin: “Është një trajner me përvojë. Me të Palermoja është bërë një skuadër. Blerje në janar? Do të kërkojmë një mbrojtës të ri cilësor, siç ndodhi me Kjaerin e Pastoren”. Duke qëndruar pikërisht te danezi, Zamparini shpjegon: “Nuk e kam ndërtuar Palermon për ta shkatërruar, Kjaer për ne është i rëndësishëm, nuk kam nevojë për parà, sepse bilanci ynë është i shëndoshë”.
Pastaj numri një i siçilianëve ndalon Simplision e Breshianon, të cilëve u skadon kontrata: “Është një çështje gjithnjë menaxherësh, Simplisio është pranë nënshkrimit, unë kam caktuar 31 dhjetorin si afatin e fundit. Besoj se ai dhe Breshiano do të nënshkruajnë, edhe pse në krahasim me Juven, Interin e Milanin, asnjë s’mund t’u japë atyre aq sa ç’u afroj unë”. Palermo që fitoi të dielën në “San Siro” duke mbizotëruar ndaj Milanit, ka rindezur ëndrrat e tifozëve të vet dhe ambiciet e presidentit. Por Zamparini qëndron me këmbë në tokë: “Me Milanin kisha fituar më parë edhe me Guidolinin si trajner. Atë vit shkuam 38 pikë, pastaj pësuam rënie. Këtë vit shpresojmë të bëjmë ndryshe”.