Verdhekuqtë kanë vënë në shënjestër numrin nëntë. Roma, duke mundur Palermon, në fakt mund të arrinte fitoren e nëntë radhazi. Një rekord ky që do ta katapultonte Ranierin në olimpin e trajnerëve të kryeqytetasve, duke iu afruar shumë Spaletit, i cili ka arritur të marrë 11 fitore radhazi. Një Romë që është ringritur nga vendet e fundit të renditjes dhe që tani pozicionohet e dyta, fryt i punës së kujdesshme të trajnerit të ri, të mbrojtjes së blinduar, por mbi të gjitha edhe të goditjeve të dënimit ose të atyre nga këndi. Në fakt, numrat janë të qartë: plot 20 golat, që kanë ardhur nga situata të tilla, të ndarë në 10 realizime nga goditjet nga këndi, 5 nga penalltitë, 3 nga goditjet e dënimit direkte dhe 2 nga goditjet e dënimit indirekte. Merita është natyrisht edhe e 11 lojtarëve që zbresin në fushën e lojës dhe e talenteve të tyre. Pizarro është një magjistar në goditjet e dënimit, ashtu si Rise dhe Toti, që godasin nga vendi si pak të tjerë në Itali. Në fund, nuk duhen harruar De Rosi, Huan, Mekses dhe Burdiso, mjeshtra të lojës ajrore.