Juventusi ka shënuar fitore prej 1-0 si mysafir i Lazios në ndeshjen kryesore të javës së 35-të në Kampionatin italian.
Vendasit ishin superiorë në gjysmën e parë, ndërsa mysafirët u zgjuan kah fundi i kësaj pjese, e cila megjithatë përfundoi pa gola.
Bardhezinjtë e nisën më mirë fraksionin e dytë të lojës, mirëpo nuk kaloi shumë kohë dhe Lazio e mori lojën në dorë duke krijuar raste, por mungonte konkretizimi.
Kah fundi i takimit, Juventusi filloi të shkaktonte presion kundrejt ekipit mysafir dhe kjo iu shpagua me gol.
Pas një krosimi të Hasan Salihamidzic, Simone Pepe realizoi golin me vlerën tre pikë (87’), për të siguruar një fitore mjaft të rëndësishme, e cila do t’i shërbejë Juventusit për ta mbyllur në mënyrë të denjë këtë sezon.
Pas humbjes së Lazios, gjithçka është e hapur sa i përket pozitës së katërt.
Kur kanë mbetur edhe tri javë për t’u zhvilluar, Udinese dhe Roma gjenden një pikë larg pozitës që çon në Ligën e Kampionëve, ndërsa edhe Juventusi mund të shpresojë për gabimet e rivalëve, pasi gjendet katër pikë larg. /JUVENEWS.TK/