Në kampionat ka luajtur pak, por në Europë adhurohet shumë, aq sa e ka bindur Zenitin e Shën Pjetërburgut të synojë tek ai.Vinçenco Iakuinta është objektivi i klubit më të pasur të Rusisë, që e kërkon për sezonin e ri që tashmë po troket. Janë rreth 13 milionë eurot e afruara për Juven, që nëse do të vendosë ta lërë “bomberin” 30-vjeçar, do të synojë te Kualjarela. Udineze mund të përfitojë 8 milionë euro për bashkëpronësinë.
Në Champions ka shënuar si ndaj Bate Borisovit, ashtu edhe ndaj Zenitit, por Iakuinta nuk aktivizohet shpesh në kampionat nga Ranieri. Megjithatë, paraqitja e mirë në Europë ka mjaftuar për t’i dhënë një mundësi që të luajë më me vazhdimësi, sidomos tani që do të rikthehet edhe Trezege nga dëmtimi.
Ja pse oferta e Zenitit (favorizuese nga aspekti ekonomik) e tërheq shumë. Paratë e rusëve do t’i shërbenin Juves të sillte në Torino një objektiv të vjetër të klubit: Fabio Kualjarelën. Më i ri se Iakuinta dhe i vlefshëm në aspektin taktik.
Kualjarela do të vinte menjëherë me formulën e bashkëpronësisë për t’u marrë më pas plotësisht nga Juvja. 15 janë milionat që kërkon Udineze, ose 2 më shumë nga ato që kërkon Zeniti për Iakuintën.