Dy javë përpara grumbullimit të parë bardhezi, trajneri i sapoemëruar Luixhi Delneri, i ka bërë me dije skuadrës që nga tani e në vazhdim duhet të punohet shumë dhe kush do të gabojë do të ndëshkohet. Një mesazh i qartë, që është lëshuar nëpërmjet mikrofonave të emisionit të Piero Kiambretit: pothuajse për të hedhur poshtë mungesën e alegrisë për të cilën është shqetësuar Felipe Melo nga grumbullimi skuadrës së Selecaos, trajneri bardhezi ka ironizuar në intervistën radiofonike, duke konfirmuar se skuadra bardhezi është një ambjent familjar dhe i qetë. Pyetja e parë ka qenë menjëherë provokuese: “Pasi keni parë Krasiç në televizion, lojtari vazhdon t’iu interesojë?”. “Po. Patjetër, thekson Delneri që është i qartë për figurën aspak të mirë të lojtarit të kombëtares serbe, një ndeshje nuk është se ndryshon gjykimin tonë. Tek Juventusi duhet të them se nuk ka nevojë për revolucione, por për freski. Duhet të ndryshojmë drejtim, por nuk duhet të hedhim gjithçka poshtë tashmë. Diçka duhet të rikuperohet dhe pastaj është e rëndësishme të përfshihen lojtarë të motivuar për të bërë një punë të mirë në mënyrë që skuadra të ndryshojë ritmin”. Dhe këtu sulmi Kiambretit: “Melo ju duket i motivuar, pasi ka sulmuar Juventusin?”. Delneri nuk shqetësohet aspak dhe nuk përdor as ndonjë rrugë diplomatike: “Do të jetë shoqëria që do të vlerësojë për deklaratat e lojtarit dhe mund të vendoset me shumë mundësi edhe një gjobë për lojtarin. Nuk e di, nëse Felipe Melo do të qëndrojë, mendoj që mund të kthehet i vlefshëm për skuadrën, por ndërkohë jo Melo i sezonit të shkuar, por ai që ka luajtur në Firence dhe në skuadrën kombëtare”. Braziliani është goditur dhe sulmuar, por duhet thënë, që gjithmonë kështu ndodh me ata që sulmojnë të parët….Gjykime dhe role
Diskutimi ndërmjet trajnerit dhe prezantuesit televiziv është zhvendosur tashmë tek lojtarët bardhezi që luajnë për Italinë dhe tek impenjimi i ardhshëm i Delnerit në bankinën e Juventusit: “Simone Pepen e kam kërkuar unë në skuadër, e njoh që nga periudha kur luante për Palermon, do ti japë shumë kënaqësi dhe gëzime popullit bardhezi. Iakinta ka luajtur më mirë kur ishte më afër Alberto Xhilardinos, është një sulmues i dytë, për intensitet loje dhe përgatitjen fizike që zotëron do të jetë një lojtar i rëndësishëm për skuadrën tonë. Markizio është duke humbur identitetin? Për ta mbajtur vendin një lojtar mund të luajë në çdo lloj pozicioni që mund t’i kërkojë trajneri, por tek Juventusi do të ketë një pozicion tjetër në mesfushë dhe do të jetë i lirë të sulmojë edhe portën”. Kiambreti kërkon të ngacmojë disi Delnerin dhe interesohet për mbrojtësin e majtë, Krishito (”nëse do të isha në vendin tuaj, do ta mbaja”), dhe trajneri është në të njëjtin mendim, por shpjegon dhe mënyrën sesi veprohet në merkato: “Ka potenciale të mëdha, por ndërkohë varet nga situatat e krijuara dhe nga skuadra e Xhenovas”. Kapitulli i largimeve është një plagë e hapur në shtëpinë e Juventusit. “Ançeloti thotë që është më e lehtë të blesh sesa të shesësh lojtarë: si jeni duke lëvizur ju që keni dhjetë lojtarë për të shitur me kontrata të larta?”, ka qenë pyetja që i është drejtuar Delnerit. Por, trajneri bardhezi menjëherë e dërgon pyetjen në një vend tjetër: “Këtë pyetje duhet t’ia drejtoni Bepe Marrotës, i cili është drejtori i përgjithshëm dhe mbulon çështjet e merkatos, Juventusi nuk duhet të nxitohet, por duhet të gjejë zgjidhje interesante. Për fat të keq duhet të luajmë në Europa Ligë, që na kondicionon disi në merkato”.
Meritokracia
Mbi rolin e tij ndërkohë, Luixhi Delneri, ka përmendur konceptin e meritokracisë që është deciziv. “Kam punuar shumë në të gjitha nivelet, më duket vetja si një njeri që nuk kam mbërritur rastësisht në këtë pozicion, por me meritokraci, kam stërvitur, luajtur dhe arritur rezultate, kudo ku kam qenë. Dhe nëse sot ndodhem tek Juventusi, nuk duhet t’i kërkoj falje asnjë njeriu: nuk do të ndryshoj sjelljen time dhe mendimin tim për futbollin. Nuk kam aspak frikë nga dështimet e Ferrarës dhe Zakeronit në këtë skuadër, është pjesë e kësaj bote. Është e vërtetë, Rafa Benitez, ndërkohë ka gjetur një skuadër të ndërtuar, por ne kemi dëshirë të madhe për t’u rikthyer tek fitoret. Është një vend i bukur për të fituar, dëshira për të rilindur, për të gjetur besueshmëri me publikun tonë”. Trajneri ndihet i nderuar që do të ulet në bankinën e Juventusit dhe ka zbuluar frazën me të cilën presidenti Andrea Anjeli e ka pritur në Vinovo ditën e prezantimit: “Më ka thënë ‘Unë dhe ti mund ta vazhdojmë këtë rrugë bashkë’. Është një biletë e bukur mirëseardhje, që më ka dhënë një dozë të madhe energjie. Andrea është një djalë i ri dhe shumë i motivuar, më ka impresionuar shumë, mbiemri i tij pastaj është një garanci e madhe”. Por, gazetari Kiambreti nuk kishte sesi të mos provokonte disi trajnerin bardhezi me një pyetje të rëndë: “Ndërmjet Benitezit dhe Murinjos, ku gjendeni?”. Delneri nuk është i papërgatitur nga kjo pyetje provokuese: “Më përpara sigurisht, për shkak të moshës, unë ndërkohë nuk kam fituar asgjë…”. Për momentin, të paktën.
Italia e Lipit
Sigurisht, trajneri bardhezi nuk do të ulej në bankinën e kaltër në një të ardhme. “Nuk do të stërvisja Italinë, do të preferoja të merrja rezultatet me klubet. Prandeli është njeriu i duhur për të zëvendësuar Marçelo Lipin? Të presim të shikojmë se çfarë do të bëj, ashtu si Juventusi duhet të më presë mua, shpresojmë të konfirmojmë atë që dimë të bëjmë…”. Por nëse do të ishte gjendur në Afrikën e Jugut në vend të Lipit, Delneri, do të kishte marrë me vete Antonio Kasanon. “Trajneri aktual i skuadrës kombëtare ka bërë zgjedhjet e tija, por Kasano do ta kishte merituar një shans. Kjo skuadër kombëtare ka mungesë fantazie, por mund ta kalojë këtë handicap me forcën e grupit dhe karakterin. Të shtunën do të shkoj në martesën e Antonios, aty do të takoj dhe ish-presidentin tim Garrone”. Tifoz i Italisë dhe socialist i bindur, trajneri bardhezi zbulon se është në favor të himnit aktual, kundër idesë së Partisë Radikale të Veriut që kërkon ndryshimin. “Nuk kam dalë tani në krah të Italisë së Marçelo Lipit, unë kam qenë gjithmonë me Italinë, të kaltërit do të dinë të gjejnë energji për të shkuar përpara. Dhe ne do ti dedikojmë nderime kampionëve tanë. Italiani është skeptik në përgjithësi, dëshiron të shikojë në fillim, por ka mbrojtur gjithmonë vendin e tij”, ka përfunduar komentin e tij, Xhixhi Delneri.