Gafat, Boruc jashtë Polonisë pas akordit me Leo Benhaker

Portierët dhe gafat, një binom që shpeshherë shihet edhe në ndeshjet ndërkombëtare. Megjithatë, ajo që ndodhi me portierin Artur Boruc është e pazakontë. "Gardiani" i Polonisë ishte lojtari më i dobët në fushë për Kombëtaren e tij, në humbjen 3-2 me Irlandën e Veriut: i pozicionuar keq në golin e parë të kundërshtarëve dhe një huq amatoresk që shkaktoi autogolin e Zevlakov. Vetëm dy javë më parë, Boruc ishte protagonisti i Sëlltik në triumfin në Kupën e Ligës skoceze, të fituar në kohën shtesë kundër Rejnxhërs. Pas ndeshjes me irlandezët, trajneri Leo Benhaker u shpreh i zhgënjyer nga rezultati, por nuk fajësoi portierin: "Duhet të tregohemi të arsyeshëm, pasi bëhet fjalë për një lojtar me shumë eksperiencë. Nëse luan me Poloninë dhe në Ligën e Kampioneve, nuk mendoj se duhet të shqetësohesh për këtë situatë. Do të ishte ndryshe nëse Boruc do të kishte qenë 20 vjeç dhe kjo ishte ndeshja e parë me Kombëtaren. Një trajner nuk mund të mërzitet për gabimet personale". Por, dëshpërimi për paraqitjen e keqe bëri që 29-vjeçari të marrë një vendim drastik. Me mirëkuptimin e trajnerit të përfaqësueses, Boruc u largua nga grumbullimi i Polonisë. "Mund ta imagjinoni edhe vetë sesi ndihet Artur në këto momente, shpjegoi Benhaker. Ndjehet fajtor për humbjen e së shtunës dhe nuk mund të themi se është mirë psikologjikisht. Biseduam me qetësi dhe së bashku dolëm në këtë përfundim: besoj se në këto momente, kthimi i tij në Glasgou është zgjidhja më e mirë për të gjithë". Sot polakët luajnë me San Marinon dhe fitorja kundër ekipit modest është e detyrueshme.