Ka lindur gjithçka rastësisht, siç ndodh shpesh në botën e futbollit. Por shpejt, idea Palermo-Ronaldo, mund të kthehet në diçka shumë serioze. Pak fjalë të drejtorit sportiv të siçilianëve, Sabatini, të thëna rastësisht (”Ronaldon do ta merrja edhe mbipeshë”) dhe hipoteza e merkatos është ndezur. Dhe shumë shpejt mund të bëhet reale. Në fakt, deklaratat e Sabatinit kanë shkuar deri në Brazil tek Ronaldo, dhe agjenti i tij Fabiano Farah ka qenë i hapur për këtë operacion të bujshëm:
“Klienti im është i kënaqur tek Korinthias ku po rekuperon formën, - ka shpjeguar ai. - Kam dëgjuar deklaratat e Sabatinit dhe jam i kënaqur pasi Palermo në këto vite është bërë një klub i rëndësishëm. Ronaldo ka një kontratë me Korinthiasin edhe për një vit tjetër dhe do ta respektojë. E ardhmja? Përparojmë ditë pas dite dhe të shohim se si do të shkojnë gjërat”. Problemi kryesor është paga e Fenomenit, jashtë parametrave të parashikuara nga klubi siçilian. Por do të mjaftonte mbështetja e një sponsori të rëndësishëm dhe ky operacion do të ishte shumë afër konkretizimit.