Roma ka ndërprerë grumbullimin e detyrueshëm në “Trigoria” pas humbjes të së shtunës në mbrëmje në Firence. Kanë qenë vetë lojtarët që kërkuan (dhe morën) ndalimin e dënimit në një takim dje në mëngjes mes kapitenit Françesko Toti dhe Daniele De Rosit si përfaqësues të skuadrës dhe presidentes Rozela Sensi. Lajmi është dhënë përmes një komunikate nga vetë lojtarët, që kanë marrë të gjitha përgjegjësitë e një vendimi të tillë.
“Në takimin me presidenten, u trajtuan të gjithë argumentat që kanë sjellë rezultatet e pakënaqshme të këtij sezoni, përfshirë dhe masat disiplinore dhe pasojat e pezullimeve, lexohej në një komunikatë të nënshkruar nga futbollistët e Romës. - U vendos të ndërpritet grumbullimi i detyrueshëm në bazë pas një kërkese të saktë nga lojtarët, duke i siguruar klubit, që do të dinë të tregojnë në këto momente të mëdha vështirësie, se është shumë i lidhur pas fanellës, duke marrë të gjitha përgjegjësitë e këtij vendimi.
I vetmi objektiv është ai që të mbyllet kampionati në mënyrën më të mirë të mundshme: një detyrë ndaj tifozëve dhe klubit”. “Në këtë mënyrë, futbollistët duan të saktësojnë që biseda e sotme (dje) me një delegacion të tifozëve, ishte pikërisht për të theksuar respektin që skuadra ruan ndaj tyre, vazhdon komunikata e nënshkruar nga verdhekuqtë. - Gjatë takimit, u thanë shumë gjëra, duke analizuar shkaqet që sollën rezultatet e këtij sezoni, pavarësisht nga pretendimet e të gjithëve, por nuk i është bërë asnjëherë trysni publikut tonë e aq më tepër në mënyrë negative”.
Ndërkohë lajme të këqija vijnë nga Doni. Portieri brazilian, pas një vizite mjekësore nga profesor Martensi në Anversë, ka vendosur t’i nënshtrohet ndërhyrjes kirurgjikale në gjurin e djathtë. Sezon i mbyllur pra dhe Doni duhet të kthehet i gatshëm pas tri muajsh.