Xhiorxhio Kielini “Do jem në fushë në ndeshjen ndaj Zenitit”

“Shpresoj të jem në fushë kundër Zenitit. Gjithkush do dëshironte ta luante një ndeshje të tillë”. Kështu është shprehur mbrojtësi i Juventusit, Xhiorxhio Kielini, i cili u dëmtua gjatë trofeut “Berluskoni”. Ndaj, ai po pret me padurim rikthimin e tij në fushë. Mbrojtësi bardhezi shpreson ta luajë që nga minuta e parë ndeshjen e parë të Ligës së Kampioneve, ku Juventusit i duhet të përballet me kampionët e Kupës UEFA dhe Supersupës, rusëve të Zenitit. “Rikuperimi nga dëmtimi po ecën mjaft mirë, – thotë Kielini. – Tani i takon trajnerit të vendosë nëse do më aktivizojë të dielën, apo më pas”. E në fund, mbrojtësi juventin u bën një premtim tifozëve të “Zonjës së Vjetër”: “Të gjithë ne kemi një dëshirë të madhe të fitojmë diçka. Dhe ju premtoj se në fund të këtij sezoni do kemi fituar kampionatin ose Ligën e kampioneve”.