“Maikon dhe Trezege mund të largohen”

Maikon dhe Trezege mund të largohen nga Italia në përfundim të këtij sezoni. Menaxheri i tyre, Antonio Kaliendo, ka qenë ai që e ka deklaruar këtë gjë. Pikërisht dje Reali ka përgënjeshtruar me anë të një njoftimi zyrtar në uebsajtin e tij çfarëdolloj interesimi për Maikon, por Kaliendo e kanë pyetur nëse është e vërtetë që disa ditë më parë ka mbërritur në zyrat e zikaltërve një faks me një ofertë nga klubi i madrilenëve. Ai është shprehur: “Reali i Madridit e kërkonte Maikon që vitin e kaluar – thekson menaxheri – por nuk e besoj historinë e faksit që ka mbërritur në zyrat e Interit, sepse në datën 15 të muajit qershor duhet të zgjidhet presidenti i ri i klubit të Realit. Kështu që një ofertë e tillë nuk duhet të ekzistojë përpara datës së lartpërmendur”. Tundimet – Kjo nuk do të thotë që Maikon duhet të qëndrojë patjetër në shtëpinë e zikaltërve. Në fakt sipas Kaliendos ka shumë oferta që i janë bërë brazilianit: “Nëse Interi duhet të bëhet pre e këtyre tundimeve, kemi ofertat e katër klubeve të mëdhenj evropianë që duan ta kenë në skuadër. Edhe Çelsi e kërkon, megjithatë nga Anglia janë të paktën tre skuadra që e kërkojnë. Nëse Interi nuk është i interesuar, do të thotë që ka një ofertë shumë të rëndësishme që nuk është zbuluar akoma”. Reali – Më pas ai i është rikthyer sërish Realit. “Reali ëndërron Maikon? – ka vazhduar menaxheri i brazilianit – Duhet të pranoj që Dagllas përputhet më së miri me kontestin teknik të madrilenëve. Por një vit më parë Interi ka refuzuar çfarëdolloj shifre dhe nuk e ka larguar lojtarin. Me presidentin e ri, që do të ofrojë një shifër shumë të madhe për merkaton, Reali i Madridit duhet të bëjë një revolucion të përgjithshëm, dhe në fakt kam dëgjuar se do të bëhen blerje të reja dhe gjithashtu do të ndryshohet edhe trajneri. Prandaj në këtë pikë ne do të jemi shumë të kujdesshëm, por më i kujdesshëm duhet të jetë Interi nëse nuk do ta humbasë
Maikon”. Trezege – Përsa i përket Trezegesë, Antonio Kaliendo shpjegon: “E di që ka pasurinteres nga Anglia dhe nga Spanja. Kam 4 vjet që dëgjoj për interesimin e tyre dhe gjithmonë kaloj të njëjtën situatë merkatoje: në përfundim të çdo tratative vjen gjithmonë Juventusi, e cila e bind lojtarin të mos largohet. Këtë vit mendoj se Barcelona do të arrijë ta marrë Trezege. Përsa i përket marrëdhënies së tij me Ranierin, të gjithë e dimë se midis trajnerit dhe lojtarëve ekzistojnë mosmarrëveshjet, por ky nuk përbën aspak një problem”.