Manchester United ka prekur kreun e Ligës Premier pasi ka mposhtur ekipin e fundit në tabelë Portsmouth, në ndeshjen e sotme të zhvilluar në Old Trafford.Tre gola të shënuar në portën e gabuar nga ekipi mysafir dhe dy të shënuar në portën e duhur nga vendasit i kanë dhënë fitoren 5-0 ekipit të drejtuar nga Sir Alex Ferguson.
Ishte Wayne Rooney ai i cili hapi serinë e golave për kampionin në fuqi të Ligës Premier, kur pas 40 minutash lojë shënoi golin e 21-të në ligë këtë sezon.
Në çastet e fundit të pjesës së parë, një goditje nga Nani u devijua nga Anthony Vanden Borre që përfundoi në rrjetën e mysafirëve për të çuar vendasit në pauzë me avantazh prej dy golash.
Skenar i ngjashëm u përsërit edhe 14 minuta pasi filloi pjesa e parë, kur goditja e Michael Carrick u devijua Richard Hughes që dërgoi topin në rrjetën e tij (59’).
Tre minuta më pas Dimitar Berbatov shënoi golin e katërt për United, para se të vijë edhe autogoli i tretë në ndeshje, kësaj here nga Marc Wilson (69’), për të vulosur dështimin e Portsmouth.
Rezultati e ngre United një pikë mbi Chelsean në maje të tabelës së Ligës Premier, së paku deri nesër kur blutë do të ketë një përballje të vështirë përballë Arsenalit në Stamford Bridge./