Shqiptari, më i mirë në fushë kundër Çelsit, Arsenalit, Man. UTD e Liverpulit
Që Lorik Cana të japë 100% të tij, ndoshta edhe më shumë, duhet që skuadra me të cilën do të ndeshet Sandërlendi i tij të jetë një nga ekipet e "Big Four" të Premier Leagues. Në këtë përfundim mund të arrihet nëse i hedh një sy të kujdesshëm listës së lojtarëve më të mirë të "Maceve të Zeza" në 18 ndeshjet e para të këtij sezoni, ku përfshihen takimet e kampionatit anglez, por edhe ato të "FA Cup" apo "Calring Cup". Sipas faqes zyrtare të Sandërlendit në internet, "www.Safc.com", që organizon edhe sondazhin, në 11 prej 17 ndeshjeve (në një takim nuk u aktivizua për shkak pezullimi nga kartonët e marrë), mesfushori shqiptar është përzgjedhur si më i miri. Por ndeshjet që e kanë karikuar Canën të japë maksimumin, kanë qenë pikërisht përballja me katërshen e të mëdhenjve të kampionatit anglez. Kundër Çelsit, Mançester Junajtid, Arsenalit dhe Liverpulit, shqiptari ka dhënë përgjigjen e tij, duke u shpallur në të katër herët si më i miri i takimit.